Parametar doo
www.poduke-split.com --- www.instrukcije-split.com --- www.repeticije-split.com
www.prevoditelji-lektori.com --- www.prijevodi-lektura.com




26.02.2005., subota
mojoj majci

fala ti za život,
za potporu,
za svaku rič ohrabrenja;
fala ti za jubav.

sritan ti rođendan mama,
volin te!



02.03.2005., srijeda
neki novi Split, s krokodilon, e...

jučer san uvati bokunić vrimena.

napravin đir po rivi, đir po gradu.
oko mene skroz nepoznat svit,
pari mi se da san furešt ovod.

a prije, prije se iza svakog kanutna
nikoj poznatoj čunki vikalo:
"evala, pomalo, ča jema?"

bura oli štagod drugo, a?

nije da znan malo judi,
znan puno svita, e...
svaki dan upoznan i niki novi svit,
ali isto pitan se: ča je ovo, a?

di ste svi za gospu blaženu?

eno nan je i krokodil na pjacu stiga,
nima više ni automata.

jedino je bajam na
balkansku (Vukovarsku) već procvita,
ranije ka i svake godine, e...

(on je uvik isti).

nadan se da ga neće posić
ka i tamarise isprid banovine, e...



13.03.2005., nedjelja
đir do otela marjan i nazad

na peškariji slabo, slabo,
nima nike ribe,
vazmen samo kil barbuni.
matejuška raskopana,
ajde radi se štagod tot.
galebi se karaju,
dica se smiju,
mišaju se sunce i oblaci.
dil svita voli ovi grad,
dil ga mrzi.
ne znan samo ča ti čine više ovod,
ča ne prisele negdi di in je dobro, a?

matejuška raskopana,
ajde valjda će bit bolje,
nadan se da će maške carice priživit,
da ih mehanizacija neće istirat.
gledan ih jutros,
side u travi,
briga ih za sve.
jemaju i prav,
zapravo,
ništa se bitno ne događa, zar ne?
i nakon svih ređenja, niki šporkaćuni se
i jopet neće popravit, ne...
ne znan samo ča ti čine više ovod,
ča ne prisele negdi di in je dobro, a?



28.03.2005., ponedjeljak
brez puno riči

diralo mi se more,
stavin ruke u more.

ležalo mi se na žalu,
legnen na žalo.

disalo mi se more,
dišen ga punin plućima.

gleda mi se kampanel,
gledan kampanel.

ništa mi ne fali,
sve moje je tot.

vražji grade, zašto nas toliko vežeš?

******

lipoton mi forcu za sve daješ,
srića je tot di si ti.



02.04.2005., subota
partija je papa

zvone zvona,
partija je veliki čovik,
partija je papa.

fala mu za sve ča je učinija za svit,
hrvatsku,
fala mu ča je vižita split.

tuga,
suze,
nima više riči.

Copyright © 2006. by XVII sva prava pridržana