Parametar doo
www.poduke-split.com --- www.instrukcije-split.com --- www.repeticije-split.com
www.prevoditelji-lektori.com --- www.prijevodi-lektura.com


16.06.2005., četvrtak
a kakva je ta riga o' veze, a? (oli samo riga)

e...

jema li (čvrste)
veze između:
sriće i nesriće,
jubavi i mržnje,
života i smrti,
mora i rive, a?

kakva je riga ča spaja?
debela i skroz kjaro
oli
mutna i mižerjasta, a?

je li spaja oli razdvaja, a?

"ča smo na ovemu svitu?"

jedan minut si
s jedne bande o' rige
a drugi s druge, e...
moš li se nosit sa svin?



18.06.2005., subota
jo dobrega vijađa



ovih dana skroz je mirno
pod provon moga broda.

mir i u meni vlada.

sve nevere su potirane ča,
ćutin samo dobro oko sebe.

ne priznajen ni rat ni karanje ni nesriću.
ka da jeman očale o' ružičaste kolure, e...

nevera je negdi daleko, ko zna kad će me strefit, e...

ne znači da moj brod ne naviga,
a jok,
samo more ne diže neveru oko prove, e...

dobro je. skroz.
triba i koji takav dan.
da te vrag ne odnese prije vrimena, e...

dikad moš u isto vrime bit u luci
i
sigurno navigat, e...
oli to nisi zna, a?
jo dobrega vijađa...



28.06.2005., utorak
a baš je jednostavno, e...

kad čovik voli ženu,
sve će učinit za sriću njenu.

kontra:

kad čovik mrzi ženu,
sve će učinit za nesriću njenu.

začuđujuće:

jema nikih žena
ča uopće ne vide
razliku između te dvi stvari.

uvik me čudi kako neko
more tako malo volit sebe, e...



30.06.2005., četvrtak
za zadnji dan o' miseca, da se popuni buža u ti kalendar, e...



e...
čovik moj,
oni dan kad si ugleda svit,
a možda i prije (ko će znat, e),
posta si dil igre.



dobija si svoju slagalicu.
bokuni ti mogu bit o' svačega (late, cukra, čikolate, kartuna, gume, cakla...).
o tebi, ali i puno drugih stvari i judi (dikad i beštija, dikad i cvića),
ovisi oćeš li uspit učinit sliku o' nje, e...



ovi bokuni ča su u mene,
e ti, ti mi se pare da su o' cakla, e...

pa moran sa svakin s puno pacijence,
da ne pukne, da ga vrag ne odnese, e...

no, gre, ne žalin se...

napiši mi priču, notaj mi stih. ne, ja nisan pisac o' štorija, a nisan ni pjesnik; stivat ću ovo ovod za zadnji dan o' miseca, da se popuni buža u ti kalendar, e... a sad gren radit moj posal, letriku, e...



03.07.2005., nedjelja
moje late


Zvonimir Mihanović

kad more pokazuje preveliku forcu
nemoj poć plivat na valove
jerbo bolit će te uvo
ka mene danas
od plivanja jučer...

e a lipo su me svitovali
dragi judi...
di ćeš,
ma šta ti je?
čuvaj se, nemoj, e...

sad me isti tješe,
razume,
žele da muka prođe.

fala in puno,
lipo je znat da je tot more lata!

Copyright © 2006. by XVII sva prava pridržana