Parametar doo
www.poduke-split.com --- www.instrukcije-split.com --- www.repeticije-split.com
www.prevoditelji-lektori.com --- www.prijevodi-lektura.com


05.11.2005., subota
ka čista kontra

Ovih mi dana
ka čista kontra
realnon
u san dolazi
Paris moga sićanja,
Seine, mostovi...

Paris šarma,
Montmartrea,
Paris jubavi i lipote.

U zoru me probude pivci
(virovali ili ne,
u mon kvatru se čuju,
to je širi centar, e...),
čujen vijesti
i pitan se di je nesta
moj lipi san.

Triba li čoviku baš toliko barufe, a?



12.11.2005., subota
ja te višje volin volit, e...



svit se na kašune i danas banja,
zvončac je pun tratinčica.
gremo li mi ovo prima litu oli zimi, a?

lipo li je...

još da oćeš, lipi naš grade, volit nas, dicu svoju
barenko bokunić o' onega ča ta ista dica jube tebe,
niko nan na ovon svitu ne bi bija ravan, e...

ovako smo,
dikad,
nesritno zajubjeni
voljeni grad i ja (mi).

niko daje, za drugog se slaže,
stivaje.
a ja ću, eto, ćutit sriću
ča te moren onako lipo
pogledat s merjana i dat ti jubav svoju.

niki nisu ni toliko dobili o' tebe,
peta si in tutokompleto roge,
pustija si ih da parte u bili svit.

mora se, dakle, su ovo sriće sritan bit...
ča ćemo? ne moremo te svi mrzit
(to triba činit za štagod dobit);
ja te višje volin volit, e...



29.12.2005., četvrtak
crno-bili svit u sivoj koluri, u iljadu koluri


flekica & pahuljica

niti je sve crno crno ka garbun
niti je sve bilo bilo ka snig.
uvik je negdi po sridi, ovako, e,
ka i moje maške, e!

uvik je i mrvu prevrtljivo.
ne moš reć da je sve
ama baš uvik kjaro,
život je dikod ka i maška,
svit je i crn i bil i siv.
iljadu koluri,
izaberi svoje najdraže
i guštaj u njima, e!



08.01.2006., nedjelja
kad ferma vitar

more muči,
čini kuco.

najedanput prošapje,
sasvin tiho,
ispod glasa.

čujen vlastite korake
i zvuk brodske makinje u daljini.

oli višje triba, a?

dobro je,
smijen se...

------------------

nikidan doživljeno,
danas na brzinu notano.



17.01.2006., utorak
(ritkin) neprijateljima

u mutnoj rigi
spajaju se kolure
ovega dana
i one ča izlaze iz moga pinela.

svaka je stina pisma,
svaki je kantun sićanje.

zgušno petajen roge dušmanima
i radin, stvaran.
uvik jema ideja,
mogućnosti,
samo ih triba vidit.

žaj mi ih je bidnih,
mižerjastih,
brez života, nikakvih,
ali dušu diteta s mora
ne more ništa fermat.

oli to niste znali, a?



23.01.2006., ponedjeljak
*****

umelo me.
sve.
svit, judi, bura i kartušina, e...
(kartušina posebno, ča se tega tiče ovo nije normalna zemlja boga mi)
pa evo tek jedan zanimljiv citat za danas:

Gdje najviše smo dali
dobivali smo manje,
al mislili smo - to je
tek privremeno stanje.

Arsen Dedić, dil pisme: Balada o prolaznosti, zbirka: Brod u boci

ne stavljan na balancu,
ma ke,
ali zapravo istina je.
ča više daš manje dobiješ.
masu puti je tako.
nažalost, e...
srića je ča život nisu samo judi,
srića je ča jeman force za izdurat.

Copyright © 2006. by XVII sva prava pridržana